«Allit ballá! Ávvoságav mån didjij sárnov, ávov gájkka álmmugij.…»
Luk 2,10
Jus gatjádav máhtá gus nammadit nágin bágojt ma duv mielas javlajda hiehpi, makkir bágojt de lidji huomahit? Iesj mujtáv moadda bágo, akta mij littji baddjen listan la báhko ávvo. «Gledelig jul!» javllap álu dárogiellaj, ja moatten javllalávllagin la javlla tiebmán, dagu «O jul med din glede» ja «Ávvo le, javlla le».
Gå javlajda gárvedahttjáp de ihkap dat merkaj ávov åhtsåt? Gå hiervvip javlajda, njálga biebmojt málestip ja nubbe nubbáj vattáldagájt vaddep. Ja miján li moattelágásj javlladábe ma mijájt bagádi majt máhttep dahkat ávov buvtátjit.
Javllaevangeliumma sisadno l ávvo. Evangelium la báhko mij grehkagielas boahtá, ja gå jårggålip de máhttep javllat javllaevangelium merkaj «javla ávvosáhka». Dánna gávnnap ienep gå ráde gåktu ávvusit, subtsastaláduvvá juoŋga birra mij la dáhpáduvvam, ja mij sierraláhkáj ávov buktá.
Javllaevangeliumma álggobágo ælla «Dale lij akti dålen» ájnat «Dan ájge». Ij la dåssju dijdda mij arvusmahttá ja ájádusájt låppti, valla dáhpádusá vissa ájgen ja bájken.
Javla ávvoságan li stuorra kontrásta.
Avta bielen li kosmihkalasj dimensjåvnå subttsasin almefuova birra Betlehema duobddágij badjel. Danna Hærrá ieŋŋgil sárnnu stuorra ávov (jali «megaávvo» jus galggá vuodotevstas bágov luojkkat): Mij lij gárveduvvam ájge guovsoj mårijdime rájes la dáhpáduvvam: «Didjij le uddni lånestiddje riegádam!»
Valla gå dáhpádusáv ålgoldis gehtjat de ij la heva boandásvuohta: Ij ladnen dáhpáduvá, ij ga idjadimbájken, ájnat stállan.... !
Ja hæjos ræjnára, ållu vuolemusán sebrudagán, li sij gudi bessi dási oassálasstet gå ieŋŋgil njuolgga sidjij sárnnu.
Soajtádahka? Jali nievres plánim? Jali le gus dánna tjåvda ávvuj: jut Lånestiddje gånågis la boahtám, gájkka álmmugij: Juohkka lágásj ulmutjijda, vájk gånnå sij li ja gåktu sijáj manná. Midjij aj!
Ávvudallup javlajt!
Gunnar Bråthen
Doajmme biskoahppa